المساعد الشخصي الرقمي

مشاهدة النسخة كاملة : نصائحكم في عصافير البقالينّو



أحمد الوحيشي
10-01-2009, 07:56 PM
السلام عليكم ورحمة الله وبركاته

يا جماعه ضروري اللي عنده خبرة يفهمنا ولا يديرلي حل للبرنامج الكئيب اللي صاير للعصافير تبعي

ايه والله خوكم مداير عصافير " بقالينّو بين قوسين عربيات " ، ومعرفتش كيف اليوم ما لياش واحد شريته

من كم أسبوع الا و انتقل الى رحمة الله ، مش عارف كيف صارله ، يعني الجو مش هاكا الصقع اليوم

وأنا مخلّيه برّا العشية ، لكن مش عارف شكله صقع ولا حاجة ومشي فيها المسكين .
ونفس البرنامج صار للي قبله ، لكن هذاكا مجاهد الحق ، يعني قعد معايا قريب السنة ، وما شاء الله عليه
لكن شكله حتى هوا صقع ولا حاة ، ولا مش عارف كيف صارله ، مع انه العصفور التاني اللي معاه
صابر وماشيه أموره .
المهم توا يا جماعه ، نبّي نعرف بالزبط كل شئ عن البقالينّو ، في أي وقت انطلعهم برا الحوش ، وآمتا
اندخلهم .
للعلم انا انطلع فيهم برا الحوش الساعة 11 الصبح واندخل فيهم في أذان المغرب ، وانوكّل فيهم
زيوان مكركب ، مع شوية خضرة ، طبعا همّا جو ينتّشوا الخضرة تنتيشه وحدة .
ويقعدوا يزريكوا لما ما نبيهمش يزريكوا ، ولما نبّيهم يزريكوا تلقاهم سايلنت .
شباب بالله نصائحكم ، لأنه توا قعد عصفور واحد كيف ما قلتلكم وما نبّيش ناخذ واحد تاني ويمشي فيها
زي الأول

في أمان الله

skinhead
14-01-2009, 01:02 AM
اول حاجة عصفور البقللينو يتحمل الصقع لكن مايتحملش المكان اللى فيه تيار قوى
واسأل روحك بالك خليته بلا ماكله واللا المكان اللى انت حاطه فيه فيه شمس قويه
ولما انت تبى تطلعه ماتخليشى يوم كامل البره .وبالذات فى الشتاء يعنى طلعه فى يوم
يكون الجو دافى خلليه يتشمس شوى
ومانتقصش عليه الزيوان لأن الجوع معكوك .والعصفور كانه جاع سلامته حتى كان عطيته
وكلا راه بيموت وأهم شى رد بالك من التيار والريح راهم ضربه ضربه موفق بإذن الله ... لك مني أجمل تحية . :alldoc (9):

المامون
15-01-2009, 02:02 AM
السلام عليكم ,, ورحمة الله وبركاته ,,

والله تقريبا نفس الصعوبات التى تواجهنـى .. ياريت حد عنده خبرة يفيدنا بأى شئ ..

وبوركت أخى أحمد على الموضوع ..

KROMOSOM
15-01-2009, 04:23 AM
السلام عليكم ورحمة الله وبركاته

من خبرتي المتواضعة في تربية البقليننو لاكثر من 4 سنوات و بداية من عصفورين لين وصلو لي 64 عصفور تفريخ داخلي ^__^ ( وجه واحد متجكتر)

نبي اول شي نوضحلك


للعلم انا انطلع فيهم برا الحوش الساعة 11 الصبح واندخل فيهم في أذان المغرب

هذا اول شي غلط

شد عندك

بالنسبة للقفص

البقلينو عصفور معروف عليه انه يتحمل و (ضد الصدمات) زي ما يقولو

يعني اللي ما عنداش في التربية و كيف بادي يبدا في البقلينو


متطلبات القفص

تنضيف يومي للقفص
زيوان مكركب عادي او تاخذله مخلط في نوعية نص كيلو بي 2 دينار و نوعية ثانية نص كيلو بي 3 دينار و هاذي باش تقوي و تسمن ( و مش لازم ال للعصفور الصغير او المريض او لو تبي تدلعه )

و الخضرة ما تحطلاش جميع الانواع
سلاطة ( خس ) ساداته و لو تبي تزيد خيار حط اما الطماطم لا ( و مش كل يوم )

و اهم شي يبي (جير) متواجد في محلات العصافير بي ربع دينار الطرف باش يقدر العصفور انه ينجر منقاره و للانثى باش تاخذ اللي تحتاجه من الكالسيوم

و يبي حضانة لو كان زوجين

و يبي مية حطله بي شرابة نفس لون القفص لو امكن

و في الصيف حطه في الشمس لفترة مش طويلة و خوذ البخاخة اللي يستعملوها الحلاقين و بخ عليهم مية مش لدرجة انك تبله بس لتغيير جو الحر

-------------
اما في الشتي ما تطلعهمش لبرا

الا لو كانت في شمس ساعة وحدة سادة و مش لازم

لان العصفور هذا تقدر تحطه في الحوش و يتربى من دون ان تطلعه ابدا

بس تطليعة الشمس مرة مرة كويسة

بس مش لدرجة من 11 الصبح للمغرب

ها هلبا و صقع على العصفور حتى البقلينو

و في الليل غطي القفص بي فوطة و خلي مكان للتنفس ( فتحة صغيرة )و لو في حظانة و فيها دحي ما تحركش القفص و خليه في مكان دافي
بعدين لما يكون لبرا يجي بحداه عصفور القصبي و مرات فيهم حشرات اسمهم الفاش او بالليبي ( القمينا ) و هي حشرات صغيرة لونها من شفاف الى اسود و صغيييرة جدا تقتل العصفور و علاجها تبخ القفص و العصفور يا اما بي بودرة مضادة ليها تنباع بي 3 دينار ( صناعة مصرية ) او بخاخ سبري ينباع بي 5 دينار ( صناعة مالطية ) و البودرة افضل
و اعراضها انك تلقى العصفور مكسد ما يتحركش او ما ياكلش و مرات ما يصفرش ابدا و تلقاه مرة مرة يبدا يحك في روحه و لو حالة قوية تلقا رجليه ملتهبات مرات او لونهم احمر و لو كان العصفور مالطي ابيض او اصفر و كان القمينا سودا كتبان عليه واضحة بالعين المجردة
و في طريقة تانية : دخل ايدك في القفص و قربها من العصافير و خليها شوي ، لو بدت تحط فيك و حسيت بقرص وحك معناها موجودة ^__^



و بعده على الدخان و زيوت المتطايرة ( يعني المطبخ )

و حاجة مهمة

العصفور لازم يكون عنده وقت للنوم يعني في الليل حطه في مكان مظلم او غطيه لانه مش حيرقد مرات و تتلخبط عليه الامور

و حاجة مهمة تانية

ما تمساش بيدك هلبا لانك مرات تعصره او توجعه
ما تنتفش ريشه
و ما تكشخش عليه ( هاذا للكناري و القرديل ) لكن حتى البقلينو لما يخاف خوفة قوية مرات معاش ياكل او يموت

هذا اللي نتفكره لتو


يعني بالمختصر

اول شي شوف لو ان العصفور مريض او لا
لو مريض عالجه
و لو ماتو اللي عندك هذوما ما تجيبش الجدد في نفس القفص
اغسله او اشري واحد جديد بي 5 دينار

و في الشتي ما تطلعهمش و خليهم في الحوش في مكان فيه تهوية كويسة و بعيد عن الصغار و القطاطيس
و نضف القفص يوميا
و خلي ساعات منظمة لنومهم حوالي 10 ساعات يوميا و تكون توقيتهم الساعات في كل يوم

و اي شي انا موجود

المامون
15-01-2009, 04:49 PM
4 سنوات و بداية من عصفورين لين وصلو لي 64 عصفور

انى قاعد نفكر فى هذه الحسبة كيف جت ..

و باقى النصائح تو نقولك ..

شكـرا يا ا و ي ش ت

KROMOSOM
16-01-2009, 12:55 AM
السلام عليكم ورحمة الله وبركاته


انى قاعد نفكر فى هذه الحسبة كيف جت ..

شد عندك

اول ما فرخ الابوين الاصليين جابو 4 دحيات

3 طلعو و وحدة لا

بعدين 5 دحيات 4 صدفو و و حدة لا
لين بدي يوصل العدد لي متوسط 6 في كل مرة

و طبعا خلال 4 شهور يكونو الصغار كبرو و واتيين للتزاوج

و نفس العملية تتكرر مع كل زوج

Naudy
16-01-2009, 09:47 PM
مع أني مش مربية عصافير .. لكني استفدت من معلوماتك كورموسوم :hesh (37):

أحمد الوحيشي
17-01-2009, 02:19 PM
السلام عليكم ورحمة الله وبركاته

شنو يا كرومو ، طلعت خبرة حتى في البقالينّو ، " باهي منيح منيح "

الحق انا توا معاش انطلع فيهم بكل ن الا لما نلقى شمس مليحه " اتدفّيني أنا واتدفّيهم همّا ، بس المشكلة الكبيرة توا

انه توا ميديرش في صوت هلبه ، يعني مرة مرة يدير في صوت ومرة يكون ساكت

طبعا العصفور اللي عندي توا هوا " أنثى البقالينّو " بالنسبة للذكر أعطى عمره الأول من بعد جهاد لعدة شهور

والتاني أعطاكم عمره من بعد جهاد يومين ، وبالنسبة للتفريخ ما يبّوش يدحّوا ، تقول متفاهمين

لكن الكلام اللي قلت عليه انه في الصيف المفروض انبخّهم بميا وكلام البودرة و الجو هذا كلّه منعرفاش

وبالنسبة للجير " الكالسيوم " قبل جبتلهم ومنقارهم ميا ميا ، لكن توا نشريلهم تاني

وعن أني نغطيهم في الليل " هذي جديده الحق " أنا منعرفهاش قبل ، بس أنا نبّي نسأل الساعة كم نغطّيهم يعني

من المغرب ولا من العشاء ، وتاني شئ تصدّق أنا مشحّطهم معاي ، مرات نقرا في الليل نفتح في الضوء وهمّا

بيرقدوا ، بس توا معاش فيها كيف " يجب أن يتم اعطاءهم حقهم في النوم " لكن 10 ساعات مش هلبه

وأما عن الزيوان ، فانا نعطي فيهم في زيوان مكركب ومرة مرة سلاطة ومرة مرة خيار ولا كوسة
والشيشة اللي انحط فيها الميا نفس لون القفص .
أنا توا خايف ناخذ " ذكر بقالينو " وميجاهدش معايا ، وزيدنا من النصائح بالله

أنا حاليا توا طلعته في الشمس " دافيه " وان شاء الله يدّفا ، وهو توا يزريك وجوه منيح "

سلام

KROMOSOM
18-01-2009, 02:22 AM
السلام عليكم ورحمة الله وبركاته

اولا اهلا اختي نودي

و لو حبيتي تاخذي عصفور قوليلي نوريك نوعية جميلة مغردة

---------

خوي احمد

كيف الحال ^__^

بالنسبة للتغريد طبعا العصفور بروحه مش حيصفر الا شوية يعني الا لما يسمع صوت يحسابه عصفور ثاني زيه فيبدى يناديله

و بالنسبة للتغطية

هما العصافير في الطبيعة يرقدو مع المغرب و ينوضو في الفجر عند الشروق

و انت تديرهذا لو يعجبك و يريحك

بس مش لازم

يعني تقدر تغطيهم مع الساعة 9 و الصبح هم تو ينوضوك بالدوشة بتاعهم ^__^ و نحي الغطا

بس مش تخنقهم بالتغطية

كله باش ما يخشش هوا مصقع و ما يشبحوش الضي فيحسابوه ليل و يرقدو

-----

و تو خوذ ذكر عادي و حطه و ان شاء الله حيعيش

و تو في البداية ابعد من الانواع الراقية زي الانجليزي و المالطي و نمبر1 و غيره
خوذ عربي بي 5 دينار و ما تاخذاش فرخ صغير هلبا و مش كبير هلبا

متوسط
تلقا جناحاته طايحات شوي و منقاره داكن سماوي و يكون ناشط
يعني لما تاخذه تشوفه يتحرك في القفص قبل ما تاخذه و يصفر باستمرار و ريشه مش منفوخ او نافش و لو كان في قفص مع عدة عصافير شوفه لو يجري في جرة الاناث و يكون ساخن و لو امكن تشوف برازه اذا كان سائل فوته لانه مريض في هذي الحالة

و انت اهتم بيهم و لو تجيب بخاخة تبخهم يكون افضل و ما يصير الا خير و حتجي بعد فترة تقوللي دحو عندي ^__^

و بالنسبة للنوم 10 ساعات او 8 ساعات مش هلبا لاني زي ما وضحت العصفور لما تغيب الشمس يرقد لانه ما يشوفش في الظلام
--------
^__^

الجمعة هاذي خذيت زوز عصافير
تو ولا عندي 5

زوز سماريس او يسموهم بسبوس او Serinus
و هاذي صورة لنفس النوع
http://gallery.photo.net/photo/5334513-lg.jpg

و كناري عدد واحد ذكر ( كيف بادي يتعلم )

يشبه لهذا
http://www2.0zz0.com/2008/01/14/19/283453033.jpg


و

زوز قراديل او ما يسمى بالحسون ( ذكر + انثى )

http://farm1.static.flickr.com/223/465235309_3b48bc2989.jpg


الصور هاذي مش ليا تو نصور و نحط صور اللي عندي في يوم ثاني ممكن غدوة

منارة
29-01-2009, 05:48 PM
شنو يا كرومو ، طلعت خبرة حتى في البقالينّو ، " باهي منيح منيح "
مــاشاء الله مــاشاء الله
:alldoc (84):

مشكوووور كورموسوم:alldoc (48):
معلومات قيمة استفدت منها:hesh (37):
ولو اني مش مفكرة اني انربي عصافير
بس في الجديد :alldoc (13):

أحمد الوحيشي
05-04-2009, 08:06 PM
up

السلام عليكمـ ورحمة الله وبركاته

والله يا خويـ كروموسومـ ، أكيد أفدتنيـ بالنصائحـ اللي أعطيته ليـ منـ قبلـ

وأنا اليومـ خذيت ذكر وانـ شاء الله يقعد معايا

بنسألكـ أولـ شئ ، ذكر البقالينو كمـ يسوى عندكمـ ، لأني شريته ب12 دينار

وثانيـ شئ ذكر البقالينو على ما نعرفـ انه لون قمة المنقار متاعه زرقاء ولا شنو

وبالنسبة للجو حاليا ، يفضلـ انيـ انخليه فيـ الحوشـ ولا كيف ؟!

والله أنا خايفـ يديرها معايـ كيفـ ما داروها اللي سبقوه

وهما حاليا قاعدينـ يتعرفوا عليـ بعضـ وربكـ يستر

KROMOSOM
07-04-2009, 01:49 AM
السلام عليكم

خوي احمد

مبارك ما خذيت ^__^

و بالنسبة لأسالتك

السعر ما نعرفش الحق لانه يتراوح من مكان للثاني بس سوم حلو 12 دينار


اما علىاللون

ايه خشمه تلقاه ازرق او سماوي هافت

و تو الجو جو ربيع

يعني طلعهم مرة مرة

و حطهم في الشمس شوي ( مش هلبا باش ما يموتش) شوية باش ينضفو روحهم بعدين حطهم في ظل

و خليهم يشمو الهوا و دخلهم بعدين معا جو العشيات


و كانك اهتميت بيه مش حيموت و يبي جو شهر الى 3 شهور باش يتعودو على بعض و يتزاوجوا

و اي شي خوي حميدة انا موجود

دمار
07-04-2009, 10:38 AM
مساء الورد
الله انموت في اي شي ليه علاقه بالحيونات كان عندي عصافير بقلينو ايمات العدادي كان بابا الله يرحمه ايربي فيهم وني طبعا معه بدو باتنين وصلوا لارقام خيالية معش ندكر بزبط بس كانو فوق الخمسين بس بخصوص الخضروات كنا نعطوا فيهم كل شي اكيد اكتر حجة السلاطة وكانو ياكلو في البيض المسلوق ويحبو الخبزة المبلولة بالحليب كنا انحطولهم في حاجة مشعارفة شني اسمها هي نلقوا فيها علي شط البحر بيضة شكلها زي السان كانت للكلسيوم الله اعلم الله يرحم ايمات زمان بعدها شدينها علي الصقوره اما توا يدوب عندي حوت وقطوسة وببغاء ومهبليني

منارة
16-11-2009, 09:22 PM
السلام عليكم ورحمة الله وبركاته
موسوعة طائر البادجى( البقالينّو ) من الالف للياءhttp://img134.imageshack.us/img134/751/132ob.gif
http://www.mfhom.com/vb/t8179.html

إن شاء الله تستفيدوا منها:happy:

الزهراء
24-11-2009, 10:05 PM
www. 2zoo.com

هذا موقع مش عادي . . . انا نربي في الباقالينو . . . والموقع يساعد في اي مشكلة ان شاء الله

وحصلته ب 12 مليح لانه واصل لل 15 تقريبا